阿力由於早幾日已抵康城（Cannes）開會嘅緣故，所以今早坐二十五分鐘的士由Cannes到Nice機場，接過我以後就到Budget攞網上已預定嘅車。
跑來跑去幾回後 (GPS壞咗，report車身有刮花嘅痕跡等)，終於可以出發。行程安排先去普羅旺斯地區嘅艾克斯 (Aix en Provence) 同馬賽 (Marseille)。做research時，大部分註釋都話Marseille比較多北非人，夜晚到外走走比較危險，所以第一晚決定選擇大學區Aix en Provence為註腳站。
由Nice到Aix大概170km，車程約80分鐘。天空蔚藍色，萬里無雲，回想由放工趕返屋企，趕去機場，坐長途機，睡眼惺惺等轉機，到家陣見到此情此景，放鬆哂！沿住A8公路，中途有toll收費站。未入收費亭都唔知價錢，到知道時就好論盡。記得其中一個toll唔收cash，試過所有信用卡都無用，要勞動工作人員幫忙找續，麻鬼煩！
喺Booking.com訂咗Hotel St Christophe，一間三星級酒店。地點絕對係superb，離開主要景點圓亭噴泉 Fontaine de la Rotonde 只不過係幾分鐘路程。由於無預約parking，落咗行李之後，酒店職員就指示最近嘅停車場。房號210，一開門，腳步不穩, 差啲暈低，房間size仲的骰過日本啲酒店！裝潢比較舊，最嚴重係只可以放一個行李，第二個已經要放上床！但係洗手間出奇地寬敞，個設計師真係估佢唔到。
泊好車，放低行李已經下晝兩點多，趕快問reception姐姐推薦食好東西嘅地方，就飛身出門！介紹嘅餐廳其實有點遠，而由酒店走兩步就到達主要街道米拉波大道Cours Mirabeau，街上餐廳處處，於是就跟隨味覺走，九秒九衝入大道上其中一間店 Bistro Romain。
